Ilinniakkamik aallartissimasamik naammassinnittarneq
Ingerlariaqqiffiusumik ilinniarfiit ilinniakkanik naatsunik nalinginnaasumik ukiunik marlunnik sivisussusilerneqarsimasunik, ilisimatusarluni bachelorinngorniarnernik ukiunik pingasunik sivisussusilerneqarsimasunik, professionsbachelorinngorniarnernik ukiunik 3,5-4-rinik sivisussusilerneqarsimasunik kandidatinngorniarnernillu ukiunik marlunnik sivisussusilerneqarsimasunik imaqarput.
2013-imi ilinniakkamik aallartitsisimasut amerlanersaasa ingerlariaqqiffiusumik ilinniagaq naatsoq aallartissimasartik, 2012-imi ilinniakkamik aallartitsisimasunut sanilliullugit, naammassisimavaat. 2013-imi ilinniakkamik aallartitsinnermiit ukiut sisamat qaangiunnerini naammassinnittarnermut procenti 14 procentinik qaffariaateqarluni 59 procentimut qaffassimavoq. Ilinniakkamik aallartitsisimasut affaannit amerlanerusut, 53 procentii, ilinniakkaminnik ukiunik marlunnik sivisussusilerneqarsimasumik naammassinnissimapput.
2012-imiit ilisimatusarluni bachelorinngorniat naammassinnittarnermut procentiat ingerlariaqqiffiusumik ilinniakkat akornanni appasinnerpaavoq. Aallartitsinermit ukiut pingasut qaangiunnerini 11 procentiisa ilinniagaq aallartissimasartik naammassisimavaat. Ukiullu tallimat qaangiunnerini 24 procentiisa ilinniagartik naammassisimallugu. Ukiup siuliani ilinniakkamik aallartitsisimasunut sanilliullugu naammassinnittarnermut procenti 8 procentinik appariarisimavoq. Ilisimatusarluni bachelorinngorniarnerni naammassinnittarnerup procentia appariartuaarusaarsimavoq 2012-imili appasinnerpaasimalluni.
2011-mi professionsbachelorinngorniarlutik ilinniakkamik aallartissimasut 52 procentiisa ukiut sisamat qaangiunnerini ilinniagaq aallartissimasartik naammassisimavaat. Ukiullu marluk qaangiuteqqinnerini 60 procentinut amerleriarsimapput. Taamaasilluni naammassinnittarnermut procentiat ukiup siuliani aallartissimasunut sanilliullugu 5 procentinik pitsanngoriarsimavoq.
2013-imi kandidatinngorniarlutik ilinniakkamik aallartitsisimasut amerlasuut ilinniakkap sivisussusilerneqarnera malillugu ilinniakkaminnik naammassinnissimapput. Ukiut marluk ingerlanerini 26 procentiisa ilinniagartik naammassisimavaat, ukiulli sisamat ingerlanerini 57 procentii naammassinnissimallutik. Naammassinnittarnermut procentip 2012-imi aallartissimasut naammassinnittarnermut procentiat annertoqatigaa.
Titartagaq 1. Ingerlariaqqiffiusumik ilinniarfinni naammassinnittarnermut procenti, 2011-mi, 2012-imi 2013-imilu aallartittut malillugit
Nalunaarut: Naammassinnittarnermut procenti ukiup pineqartup naanerani naatsorsorneqarpoq, ukiorlu siullermeerluni ilinniakkamik aallartitsivik ungaluuserlugu ilanngunneqarpoq; Ingerlariaqqiffiusumik ilinniakkat naatsut (2013), bachelorinngorniarnerit (2012), professionsbacheloringorniarnerit (2011), kandidatinngorniarnerit (2013). Ilinniakkat sivisussusilerneqarneri ukioq kaajallallugu naatsorsorneqarput.
Najoqqutaq: Naatsorsueqqissaartarfik- kisitsisaataasivimmi kisitsisit takukkit (http://bank.stat.gl/UDDISC11L).